Blomen un Planten, fien aflicht op hooch un platt

Latest

Titanenwurz

Amorphophallus titanum

Amorphophallus titanum

Düt Johr hett de Titanenwurz in uns Botaanschen Goorn blöht. De harrn se woll so fien pleegt, dat se al na  bloots twee Johrn wedder losleggt hett. An’n Oostersünndag weer dat sowiet; dor harrn se extra dat Drievhuus ok in de Nacht för Besökers opmokt. Schall jo ok böös stinken, man dor heff ik nix vun mitkregen. Ik weer al ‘n Wuch vörher dor un heff düt Bild schoten.

Hunnbloom

Taraxacum officinale

Taraxacum officinale

Is dat ni ‘n fienet Bild? Dor heff ik dat heel good mit dat “bokeh” henkregen, meen ik. “Bokeh” seggt se in Japan, wenn se meent, dat allns achter dat Motiv ni so recht scharp is.

Kliev

Arctium lappa

Arctium lappa

Op Hoochdüütsch heet de Kliev “Große Klette”. Ik frei mi jümmers wedder, wat mien Taschenknipser för lüürlüttje Soken infangen deiht, wenn he ‘n gooden Dag hett.

Lanteern

Physalis alkekengi

Physalis alkekengi

In’t verleden Johr heff ik mi ‘n Pott mit düsse fienen Lantüchten-Blomen köfft, wull ik al jümmers mol hebben. Un weet ji wat, de sünd düt Johr wedderkomen. Dor sünd sogor al twee lüttje Blöden an. Nu frei ik mi al op de Lanteerns, de dor ankomen schüllt.

Wat de Buer ni kennt …

Physalis peruviana

Physalis peruviana

…dat freet he ni. Seggt een ja so. Man nülich heff ik mi mol so’n lüttjen Korv mit Kap-Stickelbeern köfft. Weern jüst in’t Anbood west. Smecken gor ni so slecht, heff ik denn markt. Hol ik mi bestimmt noch mol wedder.

Bitterklever

Menyanthes trifoliata

Menyanthes trifoliata

Hier ümto ok Feverkruut nöömt, op Hoochdüütsch heet de Fieberklee. Düsse Plant heff ik in’n Botaanschen Goorn knipst un mutt denn tohuus eerstmol nakieken, wat dat is, dor weer neemli keen Pieker bi mit den Nomen op.

Koornbloom

Centaurea sp.

Centaurea sp.

Düsse fiene Koornbloom heff ik in’n Vörgoorn afschoten. Dat weer een spezielle Tucht mit heel groote Blööten.

Follow

Get every new post delivered to your Inbox.

Join 28 other followers